Նորություններ
Ամերիկացի վիրաբույժը անվճար վիրահատություններ է իրականացրել ուռուցքաբանության ազգային կենտրոնում
Ամերիկացի վիրաբույժը անվճար վիրահատություններ է իրականացրել ուռուցքաբանության ազգային կենտրոնում
25.10.2019

Օրերս Ուռուցքաբանության ազգային կենտրոնում անվճար լապարոսկոպիկ վիրահատություններ է իրականացրել ամերիկացի վիրաբույժ Ջենարո Դ․ Լաբելան։ Բժշկին հնարավոր էր հանդիպել միայն այն ժամանակ, երբ մի վիրահատությունն ավարտած` պատրաստվում էր հաջորդին.  էկրանի առջև ներկայանալի տեսքի համար միայն հասցնում էին սպիտակ խալաթ հագցնել։


Շատ հոգնած էր, բայց ասաց` շատ ուրախ է, որ այստեղ է և օգնում է հայ գործընկերներին. -«Այստեղ մեկ տանիքի տակ շատ հմուտ մասնագետներ են հավաքված, և նրանք շատ բարդ վիրահատություններ են կատարում։ Գործընկերների հետ համատեղ իրականացնում ենք ստամոքս-աղիքային համակարգի չարորակ նորագոյացությունների վիրահատություններ առավել նվազ տրավմատիկ՝ լապարոսկոպիկ եղանակով»:


Մեթոդն ուսուցանելու համար Լաբելան իր հետ լապարոսկոպիկ Setup սարք է բերել, որը կթողնի կենտրոնում` շնորհիվ ամերիկյան «Մեդունի» բարեգործական ընկերության:  Ջենարո Լաբելայի այցը Հայաստան նույնպես ընկերությունն է կազմակերպել:

 

«Սա դեռ սկիզբն է, կազմակերպությունը ծրագրում է շարունակել համագործակցությունն Ուռուցքաբանության ազգային կենտրոնի հետ, մասնավորապես` նոր սարքեր ձեռք բերել, և հայ բժիշկներին վերապատրաստման գործուղել ԱՄՆ լավագույն համալսարաններ։ Մեր ընտրությունը կանգ է առել Ուռուցքաբանության ազգային կենտրոնի վրա, որովհետև այն պետական կառույց է, ու, թեև այստեղ վաղուց առկա են լապարոսկոպիկ սարքեր, միևնույն է, դրանց կարիքը միշտ կա։ Հարկ եմ համարում նշել, որ կենտրոնի տնօրինությունն ու առողջապահության նախարարությունը բարենպաստ պայմաններ են ստեղծել նմանատիպ գործունեության համար», - մեզ հետ զրույցում ասաց «Մեդունի» բարեգործական ընկերության ղեկավարը։

 

Ամերիկացի վիրաբույժը անվճար վիրահատություններ է իրականացրել ուռուցքաբանության ազգային կենտրոնում


«Հայաստանում աղիների չարորակ ուռուցքների աճ է նկատվում:  Այստեղ գտնվելուս նպատակներից է բժիշկների հետ կիսվել լապարոսկոպիկ եղանակով վիրահատություններ կատարելու իմ փորձով։ Բայց ամենագլխավոր նպատակը մարդկանց գիտակցությունը բարձրացնելն է, ինչը կօգնի իրականացնել սքրինինգային ծրագրեր, դրանով իսկ հնարավորություն ստեղծել ուռուցքները հայտնաբերել վաղ փուլում և թեթևացնել վիրաբույժների գործը», - շարունակում է Լաբելան։


Ամերիկացի մասնագետը խորհուրդ է տալիս Հայաստանի 50 տարեկանն անց բնակիչներին պարտադիր կոլոնոսկոպիա իրականացնել՝ հաստ աղու քաղցկեղը վաղ փուլերում հայտնաբերելու համար։ «Հայաստանի բնակչությունը պետք է հասկանա, որ ավելի հեշտ է կանխարգելել, քան բուժել զարգացած հիվանդությունը. կանխարգելում, և ո՛չ վիրահատական բուժում», - զրույցի վերջում հավելեց նա։

 

Ամերիկացի վիրաբույժը անվճար վիրահատություններ է իրականացրել ուռուցքաբանության ազգային կենտրոնում


Վիրաբույժ Ջենարո Դ․ Լաբելան պրակտիկ բժշկական գործունեություն է ծավալում ԱՄՆ Օհայո նահանգի Ցինցինատի քաղաքի Bethesda North Hospital-ում, որը, ինչպես Ուռուցքաբանության ազգային կենտրոնը, մասնագիտացած է ուռուցքային հիվանդությունների ախտորոշման և բուժման վրա։ Նա նաև TriHealth General Surgery Residency Program-ի դասախոս է, վիրահատություններ է կատարում նաև Օհայո նահանգի Good Samaritan Hospital-ում և TriHealth Evendale Hospital-ում: Ջենարո Դ․ Լաբելան American Board of Surgery և American Board of Colon and Rectal Surgery անդամ է։

 

 

Լուրեր, հայտարարություններ
Ուռուցքբանության ազգային կենտրոնը նոր շունչ է ստանում (վիդեո) 10.08.2020

Կենտրոնի տնօրեն Նարեկ Մանուկյանի խոսքով` ՈՒԱԿ-ի շենքը կառուցվել է 1980-ականներին, և կային բաժանմունքներ, որոնք այդ ժամանակվանից ի վեր չէին վերանորոգվել։ Այժմ կենտրոնում արդիականցվում են բժշկական սարքերը, մեծ թափով իրականացվում են վերանորոգման աշխատանքներ:

Ուռուցքբանության ազգային կենտրոնում շարունակվում են բարեփոխումները 07.08.2020

Ուռուցքաբանության ազգային կենտրոնը կարելի է համարել առանցքայիններից մեր մյուս բժշկական կենտրոնների մեջ, որովհետև շատ կարևոր ուղղություն է առաջնորդում: Ուռուցքաբանությունը, որպես ուղղություն, զարգացնելու ենք, որը բերելու է բազմաթիվ փրկված կյանքերի և վերականգնված առողջությունների: Այսպիսով` հաջողություններ կունենանք բազմաթիվ կյանքեր փրկելու տեսքով:

Նոր որակ՝ Ուռուցքաբանության ազգային կենտրոնի Ախտորոշիչ ծառայությունում 06.08.2020

Սա ևս մեկ կարևոր քայլ է ՈՒԱԿ-ի համար, որը ստեղծվելուց կրել է Ռենտգենաբանության և ռադիոլոգիայի ինստիտուտ անվանումը և միշտ հայտնի է եղել իր բարձրակարգ ռենտգենաբաններով։ Այսուհետ մեր անվանի մասնագետները կաշխատեն ժամանակակից ռենտգենաբանության պահանջներին համահունչ։

Հաճախ տրվող հարցեր