Մեր մասին
Ընդունարան եվ Ամբուլատորիա
Ախտորոշման ծառայություն
Լաբորատոր հետազոտություններ
Կլինիկա
Տեսասրահ
Հետադարձ կապ
Հայաստանի Ուռուցքաբանության ազգային կենտրոն մտնելիս` առաջինը նկատում ես դիմացի պատի որմնաքանդակը: Սա դեռեւս 1981 թվականին կառուցված շենքի ինքնատիպ անձնագիրն է, անցյալի փոքրաթիվ մասնիկներից մեկը, որոնք այստեղ խնամքով պահպանվում են։ Մնացած ամեն ինչ փոխում է իր դեմքը` ժամանակի պահանջներին համապատասխան. կենտրոնը վերանորոգվում է եւ արդիականացվում: Նոր ընդարձակ ընդունարան, որտեղ այլեւս անցյալի կուտակումներ չկան, վերանորգված բաժանմունքներ եւ, ամենակարեւորը, նոր, ժամանակակից տեխնիկա:
NEWS.am Medicine-ի թղթակցի հետ զրույցում կենտրոնի տնօրեն Արմեն Տանանյանը նշում է, որ արդեն մի տարի է, ինչ վերանորոգման եւ արդիականացման աշխատանքներ են տարվում:
«Մեկ տարվա ընթացքում հիմնական մասնաշենքի մեծ մասը վերանորոգվել է։ Բացի այդ կենտրոնը համալրվել է նորագույն տեխնիկայով։ 2015 թվականին կենտրոնը ձեռք է բերել երկու նոր սոնոգրաֆ, ԿՏ, եւ նորագույն Տոշիբա մակնիշի ռենտգեն ապարատ», – ասում է նա։
Ըստ տնօրենի, կենտրոնը նաեւ օգնում է հիվանդներին թանկարժեք դեղորայքի ձեռք բերման գործում։ «Վերջին ժամանակահատվուծում հաջողվեց Առողջապահության նախարարության հետ, Հայ օգնության ֆոնդի գործունեության շնորհիվ հումանիտար ճանապարհով ձեռք բերել «Ավաստին» դեղամիջոցի 780 սրվակ։ Այն արդեն մեկ շաբաթ է տրամադրում է հիվանդներին անվճար։ Շուկայական արժեքը այդ դեղամիջոցի կազմում է 800 000–1 000 000 դրամ», – ասում է Արմեն Տանանյանը։
Toshiba մակնիշի ռենտգենյան նոր սարքը նախորդներից տարբերվում է նրանով, որ անալոգաթվային է եւ հեռակառավարվող:
«Բժիշկը գտնվում է հարակից սենյակում, չի ճառագայթվում, եւ դա բարձրացնում է եւ աշխատանքի որակը, եւ ապահովում է աշխատող պերսոնալի անվտանգությունը», – ասում է ռենտգենային ախտորոշման բաժանմունքի ղեկավար Արմեն Գիշյանը։
Ճառագայթային ախտորոշման բաժանմունքում ծանոթացնում են եւս մի հետաքրքիր սարքի. գծային էլեկտրոնային արագացուցիչ, որը կենտրոնը ստացել է ՄԱԳԱՏԵ-ի հետ համագործակցության շրջանակում: Այն եռաչափ ճառագայթման հնարավորություն է տալիս:
«Դա նշանակում է, որ մենք կարող ենք ուռուցքին մոտեցնել մաքսիմալ դոզան, մինիմալ վնաս հասցնելով շրջակա նորմալ հյուսվածքներին։ Մենք թիրախին հասցնում ենք մեր ուզած չափաբաժինը, որը կարող է ոչնչացնել կամ կայունացնել ուռուցքի աճը», – ասում է ճառագայթային բաժանմունքի ղեկավար Սամվել Քարամյանը։
Այս սարքը մի առանձնահատկություն եւս ունի. դրա մեջ ներկառուցված է հիվանդի ճիշտ դիրքավորման համար նախատեսված ռենտգենոլոգիական սարքավորում:
Կենտրոնը ձեռք է բերել նաեւ սպեկտ-գամմա-խցիկ ներքին օրգանների սցինտիգրաֆիայի համար: Ուռուցքաբանության մեջ այն հիմնականում օգտագործվում է ոսկրային համակարգի ուռուցքների եւ մետաստազների ախտորոշման նպատակով:
Քիմիաթերապիայի բաժանմունքը բազմամարդ է: Սպասում են հերթական չափաբաժինը ստանալու իրենց հերթին, այդ թվում ` Ավաստին դեղամիջոցի, որի մասին խոսում էր տնօրեն Արմեն Տանանյանը: Նկարահանող խմբին տեսնելով` մարդիկ շտապում են իրենց խնդիրները ներկայացնել. պետությունը քիչ է վճարում, դեղամիջոցները թանկ են… Մինչդեռ բուժանձնակազմի նկատմամբ հիվանդները հատուկ վերաբերմունք ունեն։ Ասում են` նրանք իսկական հերոսներ են։
