«Հաջորդ տարվանից պլանավորվում է կրծքագեղձի քաղցկեղի սքրինինգային հետազոտությունների անվճար ծրագիրն իրականացնել ամբողջ հանրապետության տարածքում»,- նշում է ՀՀ ԱՆ Վ․Ա․ Ֆանարջյանի անվան ուռուցքաբանության ազգային կնետրոնի փոխտնօրեն, ԱԱԻ ուռուցքաբանության ամբիոնի վարիչ Արթուր Ավետիսյանը «Առաջին ծրագիր» հաղորդման եթերում։

Գեղարքունիքը Հայաստանի հինգերորդ մարզն է, որտեղ ծրագիրն իրականացվում է։ Ծրագրի շահառուներն են ասիմպտոմատիկ՝ որևէ գանգատ կամ գոյացություն չունեցող, սակայն կրծքագեղձի քաղցկեղի ռիսկի տարիքային խմբին պատկանող՝ 45-68 տարեկան կանայք։ Շարժական մամոգրաֆի միջոցով 2024 թվականի սեպտեմբերի տվյալներով անվճար հետազոտել է մոտ 30․000 կին։ 300-ից ավել դեպքերում հայտնաբերվել է չարորակ նորագոյացություն։

«Կասկածելի օջախ հայտնաբերելու դեպքում ծրագրի շահառուներն իրենց ախտորոշման հետ միայնակ չեն մնում։ Անհրաժեշտ հավելյալ հետազոտություններն իրականացվում են պետական պատվերի շրջանակում»,-հավելում է ՈՒԱԿ փոխտնօրենը։

Մինչև հոկտեմբերի վերջ մամոգրաֆի տեղակայման վայրը լինելու է Վարդենիսը, ապա մինչև 2025-ի սեպտեմբեր շրջելու է Մարտունի, Գավառ, Ճամբարակ և Սևան քաղաքներում: