ՀՀ ԱՆ Վ.Ա. Ֆանարջյանի անվան Ուռուցքաբանության ազգային կենտրոնում այսօր տեղի ունեցավ «ՄԻՋԻՆ ԲՈՒԺԱՇԽԱՏՈՂՆԵՐԻ ՈՒՌՈՒՑՔԱԲԱՆԱԿԱՆ ՀԱՄԱԺՈՂՈՎ»-ը. այն ոլորտում եզակի էր և լայնամասշտաբ:

Ողջունելով համաժողովի մասնակիցներին և հյուրերին՝ ՈՒԱԿ-ի տնօրեն Նարեկ Մանուկյանն առանձնացրեց միջին բուժաշխատողների դերն առողջապահական համակարգում և շեշտեց, որ նմանատիպ՝ մասնագիտական հմտությունները բարձրացնողհանդիպումներ պետք է հաճախ կազմակերպվեն ոչ միայն բժիշկների, այլև բուժքույրերի և բուժեղբայրների համար:

 

ՈւԱԿ-ի լաբորատոր-ախտորոշիչ ծառայությունների, միջին և կրտսեր բուժանձնակազմի գծով տնօրենի տեղակալ Արթուր Ավետիսյանն էլ իր խոսքում կարևորեց հանդիպման ընթացքում ձեռք բերված գիտելիքները հետագայում հօգուտ հիվանդների օգտագործելը:

 

Մասնակիցների հետ իրենց փորձով փոխանակվեցին ՈՒԱԿ-ի և ՌԴ Ն.Ն.Բլոխինի անվան ուռուցքաբանության գիտական կենտրոնի (ՈՒԳԿ) գլխավոր բուժքույրերը, Հայկական Կարմիր խաչ ընկերության առաջին բուժօգնության բաժնի ղեկավարը և այլ՝ իրենց ոլորտի հմուտ մասնագետներ:

 

Համաժողովի նպատակն էր բուժաշխատողներին տալ մասնագիտական որակավորումները բարձրացնելու, շարունակաբար կրթվելու և վերապատրաստվելու հնարավորություն՝ մեկ հարկի տակ հավաքելով Հայաստանի և Ռուսաստանի ոլորտի արհեստավարժ մասնագետներին, ովքեր համաժողովի մասնակից գործընկերների հետ կիսվեցին քույրական գործում հաղորդակցման հմտություններով, պալիատիվ խնամքի վերաբերյալ նոր գիտելիքներով, իրենց հաջողված պատմություններով, անդրադարձան նաև բուժքույրերի դերակատարությանն առաջին բուժօգնության ընթացքում, մասնավորապես՝ արյունահոսության և շոկի դեպքում:

 

ՈՒԱԿ-ի գլխավոր բուժքույր Գոհար Մանուկյանը համոզված է, որ այս համաժողովը հիմք է լինելու տարբեր համագործակցությունների, որոնք ծառայելու են մեր երկրին ու քաղաքացիներին: