Ուռուցքաբանության ազգային կենտրոնի ուրոլոգիական բաժանմունքում հաջողությամբ կիրառվում են ժամանակակից ուղեցույցային վիրահատությունները՝ առավելապես էնդոսկոպիկ և լապարասկոպիկ եղանակներով։ Յուրաքանչյուր դեպքի համար ընտրվում է բուժման լավագույն եղանակը։

Մասնավորապես`

միզապարկի ուռուցքների սկզբնական փուլերում կատարվում են միզապարկի պահպանմամբ, առանց կտրվածքների էնդոսկոպիկ վիրահատություններ։ Խորացված փուլերում միզապարկի հեռացման անհրաժեշտության դեպքում, միզապարկի հեռացման հետ միասին մեկ փուլով կատարվում է բարակ-աղիքային նոր միզապարկի ձևավորում (հակացուցումների բացակայության դեպքում), ինչը պացիենտին հնարավորություն է ընձեռում ունենալ առանց կաթետերների՝ ինքնուրույն միզարձակությամբ վիճակ և բավարար կյանքի որակ։

Վերջինս ամբողջ աշխարհում օնկոուրոլոգիայի ամենամեծածավալ վիրահատությունն է, որը մեր կենտրոնի ուրոլոգիական բաժանմունքում կատարվում է ամեն շաբաթ։

Շագանակագեղձի հեռացման (արմատական պրոստատէկտոմիա), երիկամների հեռացումների և մասնահատումների դեպքում կիրառվում է վիրահատական բուժման առավելապես լապարասկոպիկ եղանակը։

Լապարասկոպիկ եղանակը հնարավորություն է տալիս․

• վիրահատություններն իրականացնել առավել ճշգրիտ սահմաններով և խուսափել մեծ կտրվածքներից,
• կրճատում է վիրահատության ընթացքը և հետվիրահատական շրջանը։

Քանի որ Ուռուցքաբանության ազգային կենտրոնի ուրոլոգիական բաժանմունքում լապարասկոպիկ և էնդոսկոպիկ վիրահատություններն իրականացվում են ամենօրյա ռեժիմով, վերջերս վիրահատարանը համալրվեց ևս մեկ՝ նոր սերնդի լապարասկոպիկ վիրահատական սարքավորումների հավաքածուով։ Այն հնարավորություն է տալիս վիրահատական բուժումների արդյունավետությունը հասցնել առավելագույնի։

Մենք կարևորում ենք մեր պացիենտների առողջությունը։ Մեր մասնագետները պարբերաբար վերապատրաստումներ են անցնում արտերկրի լավագույն կլինիկաներում և տեղայնացնում աշխարհում առկա լավագույն փորձն ու մեթոդները։