Ուռուցքաբանության ազգային կենտրոն էր դիմել 74 տարեկան պացիենտ՝ գանգատվելով պարանոցի շրջանի գոյացությունից: Հետազոտությունների արդյունքում պացիենտի մոտ հայտնաբերվել է 12 սմ-անոց հետերոգեն հյուսվածքային գոյացություն՝ աջ ստործնոտային, առաջնային և ստորին պարանոցային տարածություններում, կիստոզ ներառումներով: Վերջինս վերին սահմանով սերտ հարել է աջ ստորածնոտային թքագեղձին, առաջնային ստորին հատվածում վահանաձև գեղձի աջ բլթին, ունեցել է արտահայտված ծավալային ազդեցություն լծային երակի վրա: 

Գոյացությունը պացիենտին խանգարում էր շնչել, նա ուներ կլման ակտի խնդիրներ, ցավեր:

Ուռուցքաբանության ազգային կենտրոնի ուռուցքաբան վիրաբույժ, ամբուլատոր-դիսպանսեր հսկողության բաժանմունքի և ընդունարանի ղեկավար Հրայր Հակոբյանը համաձայնվել է կատարել բարդ վիրահատությունը (այն պահանջում է մեծ վարպետություն և փորձ, այլ բժշկական կենտրոններում այդ վիրահատությունից հրաժարվել էին):

Ավելի քան 5 ժամ տևած վիրահատության ընթացքում ամբողջությամբ հեռացվել է գոյացությունը, ուղարկվել հյուսվածքաբանական հետազոտության:

Վիրահատությունից հետո պացիենտի վիճակը գնահատվել է բավարար, մեկ շաբաթ անց նա դուրս է գրվել կենտրոնից:

Հ.Գ. Ուռուցքաբանության ազգային կենտրոնում նման բարդ վիրահատություններ կատարվում են հաճախ: Սա մեկն է այդ վիրահատություններից: