Ժամանակակից բրախիթերապիայի առաջատար փորձի ներդրում ՈՒԱԿ-ում
ՈՒԱԿ ներխոռոչային և ներհյուսվածքային ճառագայթային թերապիայի բաժանմունքի ղեկավար, բ.գ.դ. պրոֆեսոր Էվելինա Բախշինյանը և բժիշկ-ուռուցքաբան Հասմիկ Ավետիսյանը մասնագիտական վերապատրաստում են անցել Վիեննայի կենտրոնական կլինիկական հիվանդանոցում (AKH), որն
Ավստրիայի ամենախոշոր բժշկական հաստատություններից մեկն է:
Վերապատրաստման շրջանակում քննարկվել են արգանդի վզիկի քաղցկեղի բուժման ժամանակակից բրախիթերապիայի մոտեցումները (3D, 4D): Մասնակիցներն անմիջական մասնակցություն են ունեցել նաև բուն միջամտություններին՝ ձեռք բերելով գործնական հմտություններ:
Ժամանակակից ներհյուսվածքային բրախիթերապիան համարվում է գերճշգրիտ բուժման մեթոդ ամբողջ աշխարհում՝ թույլ տալով ճառագայթային առավելագույն ազդեցությունը կենտրոնացնել միայն բուն ուռուցքի վրա՝ միաժամանակ նվազեցնելով ազդեցությունը առողջ հյուսվածքների և օրգանների վրա:
Հիշեցնենք, որ ՈՒԱԿ-ում 3D բրախիթերապիան իրականացվում է արդեն մի քանի տարի ՝ կիրառելով տարածաշրջանում եզակի BEBIG SagiNova գերմանական սարքը, որն ապահովում է բարձր տեխնոլոգիական մոտեցում և ճշգրտություն:
Մեր մասնագետների շարունակական վերապատրաստման շնորհիվ մենք անընդհատ ընդլայնում և կատարելագործում ենք ՈՒԱԿ-ում մատուցվող ծառայությունները՝ հասցնելով դրանք միջազգային չափանիշներին համապատասխան մակարդակի: Սա հնարավորություն է տալիս մեր պացիենտներին ստանալ համալիր և որակյալ բուժում հենց Հայաստանում:
Հաշվի առնելով արգանդի վզիկի քաղցկեղի լայն տարածվածությունը Հայաստանում՝ մեր առաջնային նպատակն է կանխարգելել հիվանդածության աճը և բարելավել բուժման արդյունքները:
