Ծրագրեր

Ի՞նչ է կրծքագեղձի քաղցկեղը

Կնոջ կրծքագեղձը բաղկացած է բլթակներից (կաթնարտադրող գեղձեր), ծորաններից (փոքրիկ խողովակներ, որոնցով կաթը բլթերից հասնում է դեպի պտուկ) և ստրոմայից (ճարպային և շարակցական հյուսվածքներ, որոնք շրջապատում են ծորաներն ու բլթակները, արյունատար և ավշային անոթները):

Հիմնականում կրծքագեղձում քաղցկեղը զարգանում է ծորաններում՝ առաջանալով ծորանների երկայնքով ձգվող բջիջներում, կամ բլթակներում՝ բլթակները պատող բջիջներում: Քաղցկեղի տարածման եղանակներից մեկն ավշային համակարգով է, երբ ավիշն ավշային անոթներով հեռանում է կրծքագեղձից։ Նույն ճանապարհով կարող են տեղափոխվել քաղցկեղային բջիջները՝ ընթացքում կուտակվելով ավշային հանգույցներում, մինչդեռ արյունատար համակարգով դրանք հասնում են հեռավոր այլ օրգաններ։

Կրծքագեղձի քաղցկեղը կնոջ կամ տղամարդու կրծքագեղձի էպիթելային հյուսվածքի չարորակ ուռուցք է: Կրծքագեղձի քաղցկեղը բազմագործոն ուռուցք է, որի առաջացման հիմքում ընկած է բջիջի գենոմի ախտաբանական փոփոխությունը, ինչը զարգանում է հորմոնների և արտաքին որոշ գործոնների ազդեցության ներքո:

Կրծքագեղձի քաղցկեղը հանդիսանում է ամենատարածված հիվանդությունը կանանց մոտ հանդիպող չարորակ նորագոյացությունների շարքում:

Կրծքագեղձի քաղցկեղը կարող է ընթանալ ինչպես նրան բնորոշ նշաններով, այնպես էլ առանց որևէ կլինիկական դրսևորման: Այն հիմնականում դրսևորվում է կրծքագեղձում ուռուցքային բջիջների զարգացմամբ, որոնք կարող են հայտնաբերվել կլինիկորեն, գործիքային կամ հյուսվածաբանական եղանակներով: Կրծքագեղձի քաղցկեղի բջիջները կարող են տարածվել դեպի շրջակա ավշային հանգույցներ կամ արյունատար անոթներով այլ կենսական կարևոր օրգաններ: Կրծքագեղձի քաղցկեղը կարող է արտահայտվել նաև միայն նրա մետաստատիկ ընթացքով, առանց գեղձում ուռուցքի հայտնաբերման: