Շնորհավորում ենք մեր գործընկեր, ՈւԱԿ ախտորոշման ծառայության ռադիոլոգ Սոնա Ջիլավյանին, ում զեկույցը դեկտեմբերի 16-17-ը Astghik Medical Center-ի կազմակերպած «Ուռուցքաբանական օրեր» խորագրով գիտաժողովի լավագույն զեկույց է ճանաչվել (այն որպես լավագույն ընտրվել է դեկտեմբերի 16-ին ներկայացված բոլոր զեկույցներից):

Սոնա Ջիլավյանն իր՝ «Կրծքագեղձի քաղցկեղի մամոգրաֆիկ սքրինինգի գերախտորոշման հիմնահարցերը» թեմայով զեկույցի շրջանակում անդրադարձել է ՀՀ-ում ներդրված կրծքագեղձի քաղցկեղի մամոգրաֆիկ սքրինինգի պիլոտային ծրագրին, վերջինիս կարևորությանն ու առավելություններին, իրականացման ընթացքում առաջացած խնդիրներին և դրանց համար առաջարկվող լուծումներին: Բժիշկը պատասխանել է նաև մասնակիցներին հուզող հարցերին:

Սիրելի՛ կանայք, եղե՛ք առողջ: Եվ եթե ձեր տարիքը 40 և ավելի է, մի՛ մոռացեք տարին մեկ անգամ անցնել մամոգրաֆիկ հետազոտություն:

Գիտաժողովը նախատեսված էր ուռուցքաբանների, քիմիաթերապևտների, վիրաբույժների, մանկաբարձ-գինեկոլոգների, ռադիոլոգների համար: