Ուռուցքաբանության ազգային կենտրոնը ձեռք է բերել վերջին սերնդի CANON MEDICAL SYSTEMS APLIO I800 A դասի գերձայնային սարքավորումը, որն աշխարհում համարվում է ամենաժամանակիցն ու լավագույններից մեկը:

Կենտրոնի ձեռք բերած սարքավորումը եզակի է Հայաստանում: APLIO I800 սարքավորումներ կան երկրում, բայց ՈՒԱԿ-ի կողմից ձեռք բերվածը համարվում է եզակի իր տեսակի մեջ՝ շնորհիվ սարքավորման ֆունկցիաների, դրանում ներբեռնված նորագույն ծրագրերի, տվիչների առանձնահատկությունների:

APLIO I800-ն ունի մի շարք առավելություններ և տարբերություններ՝ 

• Smart Fusion տեխնոլոգիայի միջոցով հնարավորություն է տրվում համադրել մագնիսա-ռեզոնանսային տոմոգրաֆիայի (ՄՌՏ), համակարգչային տոմոգրաֆիայի (ՀՏ) և սոնոգրաֆիայի պատկերները, որի շնորհիվ բժիշկը տեսնում է նախկինում անտեսանելին,
• սարքավորման մեջ ներբեռնված է էլաստոգրաֆիայի կատարելագործված տարբերակը՝ մակերեսային և խորանիստ օրգան-հյուսվածքների հետազոտության համար, այդ թվում՝ լյարդի էլաստոգրաֆիա՝ տարբերակելով լյարդի ստեատոզ, ֆիբրոզ, ցիրոզ, ինչպես նաև լյարդի նորագոյացությունները,
• սարքավորումն ունի դոպլեր-դուպլեքս համակարգի կատարելագործված վիզուալիզացիա, այսինքն` ցույց է տալիս անգամ մի քանի միլիմետր տրամագիծ ունեցող մազանոթային ցանցերը,
• սարքավորումը թույլ է տալիս հայտնաբերել վահանաձև գեղձի, կրծքագեղձի միկրոկալցիֆիկատները, 
• ուլտրաձայնային սարքավորումը ապահովում է պատկերի բյուրեղյա մաքրություն: Ներբեռնված ֆունկցիաները թույլ են տալիս պատկերը ստանալ մինչև 50 սմ խորությամբ (նախկինում 10-15սմ էր ): Այսինքն՝ անկախ պացիենտի ֆիզիոլոգիական կառուցվածքից (քաշից)՝ բժիշկը ստանում է բարձր ճշգրտություն և հավաստի պատկեր, 
• բարձր տեսանելիության շնորհիվ կենսազննումը (բիոպսիան) դառնում է մաքսիմալ անվնաս, 
• սարքավորման իդեալական տեսանելիության շնորհիվ երևում են մանր հոդերը, նյարդերը, անգամ մաշկի ախտահարումները,
• հետազոտության ժամանակ բացակայում են արտացոլանքները (արտեֆակտները)` տեխնիկական պատճառով առաջացած պատկերի շեղումները: