3D բրախիթերապիայի կապակցությամբ ևս մեկ մասնագետ վերապատրաստում է անցել Իտալիայի լավագույն կլինիկաներից մեկում

Ուռուցքաբանության ազգային կենտրոնի Ներհյուսվածքային և ներխոռոչային ճառագայթային թերապիայի բաժանմունքի բժիշկ-ուռուցքաբան Հասմիկ Ավետիսյանը վերապատրաստում է անցել Հռոմի «Ջեմելլի» համալսարանական կլինիկայում, որն Իտալիայում մեծությամբ 2-րդ կլինիկան է:

Քննարկվել է արգանդի վզիկի քաղցկեղի բրախիթերապիան, որը համարվում է բուժման կրիտիկական կարևոր կոմպոնենտ:

3D բրախիթերապիան ամբողջ աշխարհում համարվում է բուժման գերճշգրիտ մեթոդ, որը հնարավորություն է տալիս առավելագույն ուղուցքասպան դոզա ուղղել անմիջապես թիրախի վրա և միաժամանակ նվազագույնի հասցնել ճառագայթային ազդեցությունը հարակից օրգանների և հյուսվածքների վրա:

Հիշեցնենք, որ ՈՒԱԿ-ում արդեն մեկ տարի շարունակ մեծ հաջողությամբ կատարվում է 3D բրախիթերապիա, որի համար կիրառվում է տարածաշրջանում եզակի գերմանական BEBIG ընկերության SagiNova սարքը։
Մեր մասնագետների պարբերաբար վերապատրաստումների միջոցով մենք ընդլայնում ենք ՈՒԱԿ-ում առաջարկվող ծառայությունները և բարձրացնում դրանց որակը՝ հասցնելով միջազգային մակարդակի, որպեսզի մեր պացիենտները համապարփակ բուժում կարողանան ստանալ մեր կենտրոնում։

Արգանդի վզիկի քաղցկեղը Հայաստանում մեծ տարածվածություն ունի.

Մեր նպատակն է նվազեցնել  քաղցկեղով հիվանդացության թվերն ու բարելավել ցուցանիշները։