1946 թվականին Հայաստանում հիմք դրվեց ուռուցքաբանությանը:  Վ.Ա. Ֆանարջյանի անվան Ուռուցքաբանության ազգային կենտրոնի համար 2016 թվականը հոբելյանական է՝ կենտրոնը նշում է մեր երկրում բժշկության այս ոլորտի 70-ամյակը:  Այս տարիների ընթացքում կենտրոնի բժշկական անձնակազմը ո՛չ միայն իր այցելուների նկատմամբ դրսևորել է պրոֆեսիոնալիզմ և հոգատար վերաբերմունք, այլև ձգտել է յուրաքանչյուր ժամանակաշրջանում բուժման համար կիրառել բժշկական նորագույն տեխնիկա:

Սույն թվականին Վ.Ա. Ֆանարջյանի անվան Ուռուցքաբանության ազգային կենտրոնը, արդեն իսկ  համալրվել է նոր սարքավորումներով, վերջին նորագույն ամերիկյան «Hologyc» մամոգրաֆով, «Phillips» անգիոգրաֆով և գերմանական «Wolf» լապարոսկոպով:

Սեպտեմբերի 29-ին Վ.Ա. Ֆանարջյանի անվան Ուռուցքաբանության ազգային կենտրոնի և իրանական «Varan Parto Darman» ընկերության միջև, որը նաև համարվում է ամերիկյան «Varian» ընկերության էքսկլյուզիվ ներկայացուցիչը  ստորագրվեց հուշագիր, համաձայն որի կկատարվեն երկկողմ բժիշկների մասնագիտական փորձի փոխանակում և վերապատրաստումներ:

«Varan Parto Darman» ընկերության գլխավոր տնօրեն՝ Մոհամադ Հոջաթփանան հայտարարեց, որ Ուռուցքաբանության ազգային կենտրոնը մոտակա 10 ամսվա ընթացքում կհամալրվի «Varian» ամերիկյան բժշկական սարքավորումներով, որը առաջատարն է ճառագայթային բժշկության սարքավորումների բնագավառում:

«Այս ձեռքբերումը կնպաստի ուռուցքային հիվանդություններ ունեցող հիվանդների բուժումը կազմակերպել արդյունավետ, իսկ մեր հիվանդներն այսուհետ ճառագայթային բուժման նպատակով չեն մեկնի արտերկիր: Վերջին տարիներին մեր կենտրոնը վերածնունդ է ապրում՝ կատարվում են շինարարական աշխատանքներ, վերանորոգումներ նաև  բուժման որակյալ արդյունք ապահովելու համար ձգտում ենք համալրել կենտրոնը նորագույն բուժտեխնիկայով, որի վառ ապացույցն է ճառագայթային բժշկությունը զարգացնելու նպատակով հայ-իրանական համագործակցության շրջանակում կատարված ձեռք բերումը»,-ասաց Վ.Ա. Ֆանարջյանի անվան Ուռուցքաբանության ազգային կենտրոնի տնօրեն Արմեն Տանանյանը:

Հայ-իրանական բժշկական հուշագրի ստորագրումն ամփոփվեց երկու երկրների ներկայացուցիչների կողմից միմյանց խորհրդանշական նվերների փոխանակումով: