Կրծքագեղձի քաղցկեղի վաղ հայտնաբերումը կարող է վճռորոշ նշանակություն ունենալ հիվանդության բուժման և հետագա ընթացքի համար։ Անաիդա Տեր-Գասպարյանի պատմությունը դրա կարևորության ևս մեկ վկայություն է։

Անաիդան պատահաբար է տեղեկացել իր մոտ զարգացող հիվանդության մասին՝ սքրինինգային հետազոտության արդյունքում։ Ստանալով ախտորոշումը՝ նա արագ անցել է անհրաժեշտ քայլերին։ Այսօր հիվանդության բուժման փուլն արդեն անցյալում է, իսկ առողջական վիճակը վերահսկվում է պարբերական հետազոտությունների միջոցով։

«Եթե չլիներ սքրինինգը, հավանաբար մինչև հիմա չէի իմանա, որ կրծքագեղձի քաղցկեղ ունեմ»,- պատմում է Անաիդան՝ ընդգծելով կանխարգելիչ հետազոտությունների կարևորությունը։

Առողջության համընդհանուր ապահովագրություն ունեցող 45–68 տարեկան կանայք կարող են անցնել կրծքագեղձի անվճար սքրինինգ։ Անհրաժեշտության դեպքում լրացուցիչ հետազոտություններն ու բուժումը ևս կազմակերպվում են առողջության ապահովագրության շրջանակում՝ պացիենտի համար անվճար։

Կրծքագեղձի քաղցկեղը վաղ փուլերում կարող է ախտանիշներ չունենալ, ուստի կարևոր է չսպասել գանգատների առաջացմանը և օգտվել հասանելի սքրինինգային հնարավորություններից։

Մի՛ հետաձգեք հետազոտությունը։ Վաղ հայտնաբերումը կարող է փրկել կյանքեր։