Ֆրանսիացի վիրաբույժ, Կոշան հոսպիտալի ուրոլոգիական բաժանմունքի վարիչ Միքայել Պեյրոմորը Հայաստան այցի շրջանակում եղել է ՀՀ ԱՆ Վ․Ա․ Ֆանարջյանի անվան Ուռուցքաբանության ազգային կենտրոնում, որտեղ հայ բժիշկների հետ համատեղ վիրահատություններ է կատարել։

Ֆրանսիացի վիրաբույժի հետ միասին ՈւԱԿ-ի Օնկուորոլոգիական բաժանմունքի ղեկավար Կարեն Ծառուկյանը, բաժանմունքի վիրաբույժներ Վիկտոր Բադեյանն ու Վարդան Առաքելյանը կատարել են 3 վիրահատություն՝ շագանակագեղձի արմատական հեռացում (ռադիկալ պրոստատէկտոմիա) լապարասկոպիկ եղանակով։ Անեսթեզիոլոգ՝ Հրանտ Կարապետյան։ Պեյրոմորը կիսվել է լապարասկոպիկ վիրաբուժության ոլորտում իր հարուստ փորձով։

Պացիենտների մոտ ախտորոշվել էր շագանակագեղձի քաղցկեղ, որի դեպքում ցուցված է ռադիկալ պրոստատէկտոմիա։ 

Լապարասկոպիկ եղանակը հնարավորություն է ընձեռում առանց կտրվածքի՝ մի քանի անցքերով անցկացված գործիքներով, ճշգրիտ սահմաններով արմատականորեն հեռացնել շագանակագեղձը շրջակա ճարպաբջջանքի և սերմնաբշտերի հետ միասին։ Շնորհիվ նորագույն լապարոսկոպիկ սարքավորումների վիրահատության սահմաններն ավելի հստակ են տարբերակվոմ։ Ներվիրահատական արյան կորուստը եղել է չնչին, հետվիրահատական շրջանը՝ զգալիորեն պակաս։

Նշենք, որ ՈւԱԿ-ի Օնկուորոլոգիական բաժանմունքում կատարվում են բոլոր տիպի ուրոլոգիական վիրահատությունները, բաց և էնդոսկոպիկ եղանակներով։ Վերջին շրջանում  զգալիորեն ընդլայնվել է նաև լապարասկոպիկ եղանակով կատարվող վիրահատությունների ցանկը, ներառելով այնպիսի ծավալուն վիրահատություններ, ինչպիսին են երիկամի և շագանակագեղձի հեռացումը։ Այդ բոլոր վիրահատությունների համար հիվանդանոցը հագեցած է անհրաժեշտ նորագույն սարքավորումներով և գործիքներով։

Միքայել Պեյրոմորը Հայաստան է այցելել Եվրոպական Ժորժ Պոմպիդու հոսպիտալի սրտանոթային վիրաբույժ Լևոն Խաչատրյանի և օրթոպեդ-վնասվածքաբան, Սենտ Անտուան հոսպիտալի բաժանմունքի նախկին ղեկավար Լևոն Դուրսունյանի հետ միասին։  Այցը կազմակերպվել է Փարիզի համալսարանական հիվանդանոցային համակարգի՝ APHP կողմից։