Անընդհատ խոսվում է առողջ կենսակերպի մասին, սակայն քչերն են նրան հետևում. չէ՞ որ առողջ կենսակերպը ներառում է ո՛չ միայն ալկոհոլից և նիկոտինից հրաժարվելը: Այն ներառում է նաև ճիշտ սնվելու սովորությունը, կանոնավոր ֆիզիկական ակտիվությունը, աշխատանքի համապատասխան ռեժիմը, հանգիստը և այլն: Հարց է առաջանում. ինչպե՞ս է այս ամենն ազդում քաղցկեղի զարգացման վրա:

ԱՄՆ Արիզոնա նահանգի Համալսարանի գիտնականների կարծիքով ուռուցքաբանական հիվանդությունների մեծ մասը պայմանավորված է հենց անառողջ կենսակերպով և շրջակա միջավայրի անբարենպաստ գործոններով, այլ ոչ գենետիկական պատճառներով:

Փորձագետները վերլուծել են 12 հետազոտությունների տվյալները, որոնք ուսումնասիրել են կենսակերպի և քաղցկեղից մահացության միջև կապը: Մասնակիցների տարիքը տատանվում էր 28-79 տարեկան:

Պարզվեց, որ քաղցկեղի կանխարգելման խորհուրդներին հետևելու դեպքում հիվանդության զարգացման ռիսկը կրճատվում է 10%-ից մինչև 45%, մահվան հավանականությունը նվազում է 14%-ից մինչև 6%, կրծքագեղձի քաղցկեղով հիվանդացությունը նվազում է 60%-ից մինչև 19%: Կամ, օրինակ, էնդոմետրիումի քաղցկեղով հիվանդացությունը՝ 60%-ից մինչև 23%, աղիքի քաղցկեղով հիվանդացությունը՝  52%-ից մինչև 27%:

Նոր հետազոտության հեղինակ բժիշկ Լինդսի Քոլերն ասել է. «Սննդակարգին չհետևելը, անբավարար ֆիզիկական ակտիվությունը, ալկոհոլի չարաշահումը և ծխելն ավելի քան 20 տոկոս դեպքերում հիվանդության պատճառ են: Այսպիսով, փոփոխելով կենսակերպը, կարելի է նվազեցնել հիվանդության զարգացման հավանականությունը»:

Այս տվյալներից հետևում է, որ յուրաքանչյուր հինգերորդ ուռուցքաբանական հիվանդ ինքն է իր կենսակերպով նպաստել քաղցկեղի զարգացմանը: