ՈՒԱԿ դիմածնոտայի վիրաբույժները հաջողությամբ հեռացրել են քթի շրջանում առաջացած ուռուցքային նորագոյացությունը և ռեկոնստրուկտիվ վիրահատությամբ շտկել հեռացված հատվածի արտաքին տեսքը։

58-ամյա տղամարդը մայիսից սկսել է նկատել, որ քթի մեջքը այտուցվում և դեֆորմացվում է։ Գանգատվել է ցավից, քթային դժվարաշնչությունից, արցունքահոսությունից։

Ուռուցքաբանության ազգային կենտրոն դիմելուն պես իրականացվել են բարակ ասեղային բիոպսիա, ՀՇ և ՄՌՏ հետազոտություններ, որոնց արդյունքում ախտորոշվել է ձախ քթաարցունքային խողովակի լորձաթաղանթի ադենոիդ ցիստիկ քաղցկեղ։

Պացիենտի փուլային բուժումը սկսվել է վիրահատությունից։

Մոտ 3 ժամ տևած վիրահատության ընթացքում ՈՒԱԿ դիմածնոտային վիրաբույժները առաջին հերթին իրականացրել են ուռուցքի ռադիկալ հեռացում՝ վերին ծնոտի, քթային մակերեսի, քթի մեջքի, վերին և միջին քթային խեցիների, քթի միջնապատի հետ միասին։ Հաջորդ փուլում տիտանե ցանցով և պտուտակներով իրականացրել են հայմորյան խոռոչի առաջային պատի ռեկոնստրուկցիա, ապա դեֆեկտի ռեկոնստրուկցիա՝ ձախ ճակատի պարամեդիալ ռոտացիոն լաթով (հնդկական լաթով)։

Վիրահատությունն իրականացրել են Սերգեյ Սեինյանի անվան հենաշարժիչ համակարգի ուռուցքաբանության բաժանմունքի բժիշկ-դիմածնոտային վիրաբույժ Հայկ Բաբայանը և բժիշկ-դիմածնոտային վիրաբույժ Սերգեյ Ղազանչյանը։Անեսթեզիան իրականացրել է Անզգայացման և վերակենդանացման բաժանմունքի բժիշկ-անեսթեզիոլոգ-ռեանիմատոլոգ Կոնստանտին Մակարյանը։

Հետվիրահատական շրջանը տևել է 6 շաբաթ, անցել է առանց հավելյալ բարդությունների։

Հաջորդիվ պացիենտը ստացել է ճառագայթային թերապիա։ Բուժումն իրականացրել է Հեռահար ճառագայթային թերապիայի բաժանմունքի բժիշկ Սերգո Մխիթարյանը։ Մեկ ու կես ամիս տևած բուժման ընթացքում մեծ է եղել տեսողությունը կորցնելու հավանականությունը, քանի որ ճառագայթվող հատվածները շատ մոտ էին աչքերին։ Սակայն, բուժումից հետո հաջողվել է պահպանել տեսողությունը։

Այս պահին պացիենտը գտնվում է դինամիկ հսկողության տակ։