Ուռուցքաբանության ազգային կենտրոն է այցելել ԱԷՄԳ գլխավոր տնօրեն Ռաֆայել Գրոսսին
Երկօրյա աշխատանքային այցով Հայաստանում գտնվող Ատոմային էներգիայի միջազգային գործակալության (ԱԷՄԳ) գլխավոր տնօրեն Ռաֆայել Գրոսսիի գլխավորած պատվիրակությունն այցելել է ՀՀ ԱՆ Վ.Ա. Ֆանարջյանի անվան Ուռուցքաբանության ազգային կենտրոն:
Առողջապահության նախարար Անահիտ Ավանեսյանի և ՈՒԱԿ-ի տնօրեն Նարեկ Մանուկյանի ուղեկցությամբ հյուրերը շրջել են ՈւԱԿ-ում, ծանոթացել իրականացված լայնածավալ աշխատանքներին, ձեռքբերված նոր սարք-սարքավորումներին, մատուցվող ծառայությունների լայն շրջանակին, եղել ՈՒԱԿ-ի` ս.թ. հոկտեմբերին 8-ին բացվող Պալիատիվ ծառայության նորակառույց կլինիկայում, կառուցվող նոր տեխնոլոգիական մասնաշենքի շինհրապարակում։
ՈւԱԿ տնօրեն Ն. Մանուկյանը շնորհակալություն է հայտնել Ատոմային էներգիայի միջազգային գործակալության ներդրումների համար, փաստել, որ տրամադրված սարք-սարքավորումները, որոնցից շատերը եզակի են Հայաստանի համար, կարևոր նշանակություն ունեն պացիենտների բուժման համար. դրանք ծառայում են ի նպաստ նրանց առողջության, կյանքի որակի բարձրացման:
ԱԷՄԳ գլխավոր տնօրեն Ռաֆայել Գրոսսին դրական է գնահատել վերջին շրջանում Ուռուցքաբանության ազգային կենտրոնում տեղի ունեցած փոփոխությունները: Գրոսսին վստահեցրել է, որ ձեռք բերված պայմանավորվածությունները կրելու են շարունակական բնույթ, էլ ավելի մեծ թափով կլինեն նոր ծրագրերը: «Ուռուցքաբանության ազգային կենտրոնը ունի Ատոմային էներգիայի միջազգային գործակալության լիարժեք աջակցությունը»,- զրույցի վերջում հավելել է Ռաֆայել Գրոսսին:
