Ուռուցքաբանության ազգային կենտրոնի Կանանց առողջության կլինիկայի բժիշկ-ուռուցքաբան Մետաքսյա Մկրտչյանը մարտի 11-22-ը «Կրծքագեղձի օնկոպլաստիկ և ռեկոնստրուկտիվ տեխնիկաների հմտությունների զարգացում» թեմայով վերապատրաստում է անցել Ֆրանսիայի «Գուստավ Ռուսսի» քաղցկեղի կենտրոնում։

Համատեղ իրականացված 40-ից ավելի օնկոպլաստիկ մասնահատումները և ռեկոնստրուկտիվ վիրահատությունները հնարավորություն են տվել տիրապետել տեխնիկական բարդ հմտությունների։ Իրականացվել է կրծքագեղձի ռեկոնստրուկտիվ վիրահատությունների հետվիրահատական բարդությունների նվազեցմանը միտված գործելակարգերի ուսուցանում։

Վերապատրաստման ընթացքում նպատակաուղղված ուսուցանում է եղել կրծքագեղձի վիրահատություններից հետո էսթետիկ ուղղումների կատարումը լիպոֆիլինգի եղանակով (Fat-grafting): Լիպոֆիլինգը կամ սեփական ճարպի փոխպատվաստումը վիրաբուժական միջամտություն է, որը ներառում է ճարպի տեղափոխում մարմնի մի հատվածից մյուսը:

Այս պրոցեդուրան հաճախ օգտագործվում է կոսմետիկ և վերականգնողական վիրաբուժության մեջ՝ մարմնի տարբեր մասերի ծավալը մեծացնելու կամ վերականգնելու համար։ Սեփական ճարպի օգտագործման առավելությունն այն է, որ նվազում է ալերգիկ ռեակցիաների կամ մերժման վտանգը։

Շարունակական դարձնելու համար վերապատրաստումների անցկացումն աշխարհի լավագույն բժշկական կենտրոններում ՈՒԱԿ-ը հուշագիր է ստորագրել «Գուստավ Ռուսսի» քաղցկեղ կենտրոնի հետ և ձեռք է բերել պայմանավորվածություն հետագա վերապատրաստումների կապակցությամբ։

Մեզ համար կարևոր է որակյալ ծառայությունների մատուցումը և գրագետ լուծումների առաջարկումը։