Կանխարգելումն առավել արդյունավետ է լինում, երբ մեկտեղվում են ոլորտի մասնագետների ջանքերը

Ուռուցքաբանության ազգային կենտրոնում շաբաթ օրն աշխատանքային էր: Կենտրոնում էին հյուրընկալվել Երևան քաղաքի առողջության առաջնային պահպանման (ԱԱՊ) օղակի ուռուցքաբանները:

Հանդիպման ընթացքում ուռուցքաբան մասնագետներին ՈւԱԿ փոխտնօրեններ Ալեքսանդր Սեինյանի և Արթուր Ավետիսյանի, ինչպես նաև մի շարք այլ բաժանմունքների մասնագետների կողմից ներկայացվեցին ՈՒԱԿ-ում իրականացված բարեփոխումները, մատուցվող ծառայությունները, նորագույն սարք-սարքավորումներով հագեցվածությունը, արդեն իսկ իրականացված բացառիկ վիրահատությունները: Մասնագետների հետ քննարկվեցին առողջապահական կարևոր ոլորտի խնդիրները, բարձրաձայնվեցին դրանց լուծման տեսլականները, փոխանակվեցին փորձով:

Հաշվի առնելով երկրում ուռուցքաբանության պարբերական զարգացումը՝ ՈՒԱԿ տնօրեն Նարեկ Մանուկյանն իր ողջույնի խոսքում կարևորեց նեղ-մասնագետների հետ կապի ստեղծումն ու պահպանումը, խնդիրների համատեղ պարբերական քննարկումներն ու դրանց լուծումներ գտնելը՝ ի շահ մեր համաքաղաքացիների:

Երևան քաղաքի առողջության առաջնային պահպանման օղակի ուռուցքաբանները գոհունակությամբ արձանագրեցին կենտրոնի՝ ուռուցքների բուժման և կանխարգելման ժամանակակից մոտեցումները, իրականացված բարեփոխումները և փաստեցին, որ զարգացման այսպիսի քայլերով շուտով ուռուցքաբանությունը Հայաստանում կբարձրանա նոր, միջազգային չափանիշներին չզիջող մակարդակի:

Նման հանդիպում-քննարկումները լինելու են շարունակական: