Մասնագիտական փորձի փոխանակումը` լավագույն արդյունքի հասնելու գրավական
Ուռուցքաբանության ազգային կենտրոնը, նպատակ ունենալով խթանելու բուժաշխատողների վերապատրաստումն ու գիտելիքների թարմացումը, պարբերաբար կազմակերպում է գիտաժողովներ ու կրթական սեմինարներ, որոնց ընթացքում տեղի են ունենում մասնագիտական քննարկումներ։
Օրերս կենտրոնում տեղի ունեցավ թոքի քաղցկեղի վերաբերյալ գիտակրթական սեմինար, որի ժամանակ, մասնավորապես, անդրադարձ է կատարվել հետևյալ թեմաներին՝
- Թոքի մանրբջջային և ոչ մանրբջջային քաղցկեղի բուժման ժամանակակից մեթոդներին,
- թոքի քաղցկեղի բուժման մեջ իմունաթերապիայի կիրառման ժամանակակից մոտեցումներին,
- ներկայիս կլինիկական հետազոտությունների թարմացումներին։
Զեկույցով հանդես են եկել Ուռուցքաբանության ազգային կենտրոնի Դեղորայքային ուռուցքաբանության բաժանմունքի ղեկավար Նաիրա Ջանոյանը, նույն բաժանմունքի բժիշկ-քիմիաթերապևտ Կարինե Սողոմոնյանը և Թորակալ վիրաբուժության բաժանմունքի ղեկավար Տիգրան Բյուզանդյանը։
Վերջինս ներկայացրել է կենտրոնում նեոադիուվանտ բուժման մեջ իմունաթերապիայի կիրառմամբ իրականացված կլինիկական դեպք։
Պացիենտը ստացել էր նախավիրահատական զուգակցված քիմիա- և իմունաթերապիա, որի արդյունքում եղել էր հիվանդության լիարժեք հետաճ։ Վիրահատությունից հետո պացիենտը գրանցել էր դրական արդյունք, գտնվում էր մասնագետների հսկողության տակ և շարունակում էր բուժումը։
Մեր կենտրոնը կարևորում է մասնագետների բարձր պատրաստվածությունը․ մենք կարևորում ենք ձեր առողջությունը։
