ՀՀ ԱՆ Վ․Ա․ Ֆանարաջյանի անվան Ուռուցքաբանության ազգային կենտրոնում կայացավ «Հենարան» բարեգործական հիմնադրամի  հրատարակած «Ճառագայթային թերապիա․ Ուղեցույց պացիենտների և խնամատարների համար» գրքույկի շնորհանդեսը, որին ներկա էին  Հայաստանում Նիդերլանդների Թագավորության լիազոր և արտակարգ դեսպան, պարոն Նիկոլաս Սխերմերսը և Առողջապահության նախարարության Բժշկական օգնության քաղաքականության վարչության պետ Քնար Ղոնյանը։

Գրքույկի տպագրությունը ֆինանսավորվել է Նիդերլանդների Թագավորության կառավարության կողմից տրամադրված դրամաշնորհի շրջանակներում։ Ներկայացնելով ձեռնարկը, դեսպանը հույս հայտնեց, որ պացիենտների իրազեկվածությունը կբարձրացնի բուժման արդյունավետությունը և դրականորեն կազդի նրանց կյանքի որակի վրա։

Ուռուցքաբանության ազգային կենտրոնի տնօրեն Նարեկ Մանուկյանը շնորհակալություն հայտնեց դեսպանին կարևոր ծրագրի իրականացման համար, որի շնորհիվ մարդու իրավունքների հովանու ներքո պացիետների իրավունքները և իրազեկվածության նշանակությունը ևս մեկ անգամ կարևորվել են։

Հյուրերը շրջայց կատարեցին կենտրոնում, այցելեցին Ճառագայթային թերապիայի, Ճառագայթային գինեկոլոգիայի բաժանմունքներ և պալիատիվ բաժանմունքի շինհրապարակ։ ՈՒԱԿ Ճառագայթային թերապիայի բաժանմունքի վարիչ Թաթուլ Սաղաթելյանը ներկայացրեց կատարվող աշխատանքները։

Դեսպանը շատ տպավորված էր կենտրոնի նորոգված բաժանմունքներով և ընթացող աշխատանքներով։