ՀՀ ԱՆ Վ.Ա. Ֆանարջյանի անվան Ուռուցքաբանության ազգային կենտրոնի տնօրեն Նարեկ Մանուկյանն այսօր հյուրընկալել է «Netcracker/BostonGene» ընկերությունների ներկայացուցիչներին:

«BostonGene»-ը աշխարհահռչակ միջազգային կազմակերպություն է, որը գործում է կենսաբժշկական էլեկտրոնային ծրագրերի (software) ստեղծման բնագավառում: Ընկերությունն իրականացնում է ուռուցքների և ուռուցքային միկրոմիջավայրերի համապարփակ ինտեգրված գենոմային (WES) և տրանսկրիպտոմիկ (RNA-seq) թեստավորում, որը բժիշկներին տրամադրում է անհրաժեշտ տեղեկություն անհատական թերապիայի ամենաարդյունավետ ռազմավարությունը մշակելու համար:

Հանդիպման ընթացքում կողմերը քննարկել են համագործակցության հնարավոր ոլորտները, ծանոթացել ՈՒԱԿ-ի կողմից մատուցվող ծառայություններին և դրանց ծավալներին:

Կարևորելով առաջատար կազմակերպության դերն ուռուցքաբանության զարգացման մեջ՝ կենտրոնի տնօրեն Նարեկ Մանուկյանը շեշտեց երկու կողմերի համագործակցության ահնրաժեշտոթյունն ու վստահեցրեց, որ ապագա ծրագրերը ծառայելու են ի շահ հիվանդների, հիվանդության դեմ պայքարի արդյունավետության և լինելու են Հայաստանում ուռուցքաբանության ոլորտում նոր ձեռքբերումների հենակետ: