Պաշտպանի՛ր մաշկդ արևի ճառագայթներից

Ամառվա ամիսներին մաշկն ավելի խոցելի է դառնում։ Մաշկային տարատեսակ հիվանդություններ, այդ թվում չարորակ ուռուցքներ, առաջանում են ուլտրամանուշակագույն ճառագայթների ազդեցությունից, ուստի, անհրաժեշտ է խուսափել արևայրուք ստանալուց։ Դա է պատճառը, որ արևայրուք հաճախ ընդունող մարդիկ գտնվում են ռիսկի բարձր գոտում։

Արևի ճառագայթների ազդեցությամբ են պայմանավորված՝
Մաշկի բազալ բջջային քաղցկեղի առաջացման 90 տոկոս դեպքերը,
Նևուսների, խալերի մելանոմայի վերափոխման 30 տոկոս դեպքերը,
Տափակբջջային քաղցկեղի առաջացման որոշ դեպքերը։

Ինչպե՞ս պաշտպանվել.

• Խորհուրդ է տրվում խուսափել արևի ուղիղ ճառագայթների տակ գտնվելուց (11։00-17։00-ն ընկած ժամանակահատվածում ուլտրամանուշակագույն ճառագայթների ազդեցությունն ամենաբարձր կետում է գտնվում),
• Պարտադիր կրել ակնոց, գլխարկ, երկարաթև հագուստ և օգտագործել արևապաշտպան քսուկներ (բարձր SPF-ով),
• Հրաժարվել արհեստական արևայրուքների ստացումից (սոլյարի)։

Կարևոր է հետևել մաշկային փոփոխություններին, եթե որոշակի անհանգստացնող նշաններ կամ փոփոխություններ եք նկատում, օրինակ խալերի չափերի, ձևի փոփոխություն, արևայրուքից մնացած վերքի դժվար լավացում (15 օր և ավելի)՝ անմիջապես պետք է դիմել մասնագետին։

Հետազոտությունն սկսվում է դերմատոսկոպիայից, այնուհետև, անհրաժեշտության դեպքում, կատարվում է բջջաբանական կամ հյուսվածքաբանական քննություն, որից հետո համապատասխան բուժում է նշանակվում։

Հետևե՛ք ձեր առողջության մասին, եղե՛ք առողջ։