«Թո՛ղ բոլոր բալիկները լինեն առողջ, խաղաղ երկրում». Գեղամ Զիլիֆյան

Ի դեմս մեր փոքրիկ պացիենտի՝ շնորհավորում ենք բոլոր փոքրիկներին Երեխաների պաշտպանության միջազգային օրվա առթիվ՝ մաղթելով քաջառողջություն, խաղաղ երկինք և գունազարդ մանկություն:

Մեր այսօրվա հերոսը՝ Գեղամը, 9 տարեկան է, փոքրիկ հեքիաթագիր, մի շարք մրցույթների («Կենգուրու», «Իմ ընկեր Ալենը») մասնակից: Չեք հավատա, բայց այս ամենի հետ մեկտեղ նաև պարում է «Գիսաստղ» պարային անսամբլում: 

Մեր ծանոթությունը տեղի է ունեցել մայիսին, երբ Գեղամի ծնողները դիմել էին ՈւԱԿ Սերգեյ Սեինյանի անվան հենաշարժիչ համակարգի ուռուցքաբանության բաժանմունք, քանի որ պատահական արված ռենտգենի արդյունքներով նրա մոտ հայտնաբերվել էր աջ բազկոսկրի բարորակ գոյացություն:

ՈւԱԿ հմուտ մասնագետներն իրականացրել են վիրահատական միջամտություն` հեռացվել է գոյացությունը, կատարվել պլաստիկա` արհեստական ոսկրանյութով:

Այս պահին Գեղամը գտնվում է դինամիկ հսկողության ներքո:

Իր հերթական ստուգիչ այցի օրը Գեղամը մեզ չմերժեց և պատասխանեց մեր մի քանի հարցերին:

***

 ԻՄ ՀԵՔԻԱԹԱՅԻՆ ԱՇԽԱՐՀԸ. հարցազրույց մեր փոքրիկ բարեկամի հետ

 ⁃ Եթե մի օր կարողանայիր թռչել, ո՞ւր կգնայիր։

 ⁃ Կթռչեի դեպի տիեզերք: 

 ⁃ Եթե ունենայիր կախարդական փայտիկ, ի՞նչ կփոխեիր աշխարհում։

 ⁃ Որ բոլոր բալիկները լինեին առողջ, ապրեին խաղաղ երկրում:

 ⁃ Ո՞ր հեքիաթի հերոսն ես ուզում լինել:

 ⁃ Հայկ Նահապետը:

 ⁃ Ի՞նչ կենդանի կցանկանայիր ունենալ՝ որպես լավագույն ընկեր։

 ⁃ Ես միշտ ուզել եմ շուն ու վերջերս բակից մի շան բերել եմ տուն, և պահում ենք:

 ⁃ Եթե դու նկարեիր մի նոր հիվանդանոց, ի՞նչ գույներով ու ձևով կստացվեր այն։

 ⁃ Վառ գույների մեջ կլիներ: Իմ ամենասիրած նարնջագույնով: 

 ⁃ Ի՞նչն է քեզ ամենաշատը ուրախացնում։

 ⁃ Ամենից շատ ուրախանում եմ իմ ծննդյան օրը: Մեկ էլ, երբ շախմատ եմ նվեր ստանում: 

 ⁃ Երբ մեծանաս, ի՞նչ մասնագետ ես ուզում դառնալ։

 ⁃ Ուզում եմ դառնալ բժիշկ, որ բոլորին բուժեմ, և հիվանդ մարդ չլինի:

 ⁃ Եթե գրվեր հեքիաթ քո մասին, ի՞նչ վերնագիր կունենար այն։

 ⁃ «Իմ ընկերը»:

 ⁃ Որ օրը կհռչակեիր «Երեխաների լավագույն օրը» և ինչպիսի՞ն կլիներ այդ օրը: 

 ⁃ Տղաների օրը` փետրվարի 23-ը: Կլիներ ընկերների օր` շատ ուրախ և լիքը խաղերով: 

Հ.Գ. Այսօր մեր նորաթուխ հեքիաթագիրը մասնակացում է Անգլիական այգում կազմակերպված «Մանկական գրքի փառատոն»-ին, որի ընթացքում, որպես հատուկ հյուր, Գեղամը ներկայացնելու է իր առաջին հեքիաթը` «Աղվեսը»:

Եկեք բոլորով նրան մաղթենք հաջողություն և քաջառողջություն:

Լուսանկարները և նյութը հրապարակվել են ծնողի թույլտվությամբ: